Ngā Tauira Whakaakoranga

Arotahinga: Te kaupapa matua o te pukapuka

• Tautohua te kaupapa kei te taitara o te pukapuka.
• Me ōhia manomano e whakarāpopoto ai i te kaupapa o te pukapuka (tuhia hoki ngā kupu, ngā āhuatanga rānei o te pukapuka e taunaki ai i ngā whakaaro).

Te whakamāramatanga:

• Whakaatuhia te uhi o te pukapuka ki ngā ākonga.
• Kōrerohia ētahi āhuatanga o te whakaahua me ngā kupu kāore pea e tino mārama ki ngā ākonga.
  • He aha te tino kaupapa o te pukapuka?
  • Ka pēhea koe/koutou e mōhio ai?
  • He aha ngā tīwhiri i te uhi e taunaki ana i ōu/ō koutou whakaaro?

Matapae:

Tuhia ētahi kupu mai i te pukapuka ki te papamā pēnei i te: tapaina, taniwha, mounga, puna wai, Te Moana i Raukawakawa … kaua e neke atu i te 10 kupu.

• Me noho takirua ngā ākonga kia kōrerohia ngā pātai, ngā kupu hoki mō te 5 meneti.
• Kia mutu te kōrero, me hui anō te katoa kia wānangahia te kaupapa o te pukapuka.

Whakaaro ā-mua, Whakaaro ā-muri

• He mahi takitahi, he mahi takirua rānei.
• Kei ia tamaiti, ia takirua rānei tētahi hīti mahi.
• Ko te mahi ko te tuhi i ētahi kōrero e mōhio kētia nei e ngā akonga mō te pukapuka i mua i te pānuitanga.
• Hei te mutunga o ngā mahi ka hoki atu anō ki te hīti mahi ki te tuhi i ētahi mōhiotanga hou.

Kimihia te Tikanga

Te Whakamāramatanga:

• He rautaki tēnei hei whakawhānui atu i te puna kupu me te mōhiotanga ki te tikanga me te whakamahinga o te kupu hou.
• Ko tā te ākonga he kimi i te tikanga o ngā kupu hou kātahi ka whakahoahoa ki te tauira mai i te pukapuka.

Arotahinga:

Ko te ako i ngā ingoa ka kōrerohia i te pūrākau nei, ā, ka rangahau kei hea aua wāhi.

Kimihia ngā wāhi

• He mahi takirua, takirōpū rānei
• Ina pānui ana, whakarongo ana rānei ki te pukapuka, tuhia ngā ingoa o ngā wāhi pēnei i ngā maunga, awa, moana, aha noa kei te pūrākau nei
• Rangahaua ngā wāhi kātahi ka tohu i aua wāhi ki tētahi mahere whenua
• Mehemea he ingoa tawhito kimihia ngā kōrero mō taua ingoa, tērā pea ka pātai ki ngā pakeke.
  • Wellington Harbour Map
  • Map of Wellington Region

He Pātai

He kohinga pātai e hāngai ana ki ngā tohu wāhi i kōrerohia i te pūrākau nei.

• Ko wai te ingoa o te whare i whakatūria mō Māui, mō Tangaroa mā?
• Ko wai te ingoa o te puna wai kei te karu o te ika?
• I wawāhitia e Ngake te tūtakitanga o te kauwae ki hea?
• Ko wai te awa ka rere mai i Te Wai Mānga?
• Ko hea te wāhi i tata ki ngā niho kotetē o te ika?
• I puta a Ngake ki hea?
• I whakangā a Ngake ki hea?
• Ko wai te ingoa tuatahi o ngā kongakonga?
• I ngā tau i muri mai i tapaina ngā kongakonga ki ētahi ingoa rerekē? Ko wai ngā ingoa?
• Ko wai te te mounga tapu i kakea e Whātaitai?
• Ko wai te ingoa o te tihi o te mounga?

Arotahinga: Toi Ataata

Whakaahuatia te tikanga o te kupu
Mā te kaiako e whakatau pēnā he mahi takitahi, he mahi takirua rānei tēnei.

• Kōwhirihia ētahi o ngā kīanga taurite i whakarārangihia i te ngohe ‘Kimihia te Tikanga’ (Tukuna rānei mā ngā ākonga e whiriwhiri i tētahi kīanga e ngākaunui ana rātau).
• Tuhia ngā kīanga ki ētahi kāri, whakaatuhia atu ki ngā ākonga. Mā ngā ākonga tētahi e whiriwhiri hai whakaatatanga mā rātau.
• Me āta whakaaro ngā ākonga ki te tikanga o te kīanga, ā, me whakaata te tikanga e rātau kia whakamāori ake i ō rātau whakaaro.
• Ākene pea ka whai whakaaro anō te/ngā ākonga ki tētahi atu horopaki e hāngai ana ki te kīanga, ā, ka whakaatahia tēra.

Hai whakaaro anō:

• Whakaritea he whakaaturanga, he maramataka rānei hai whakanui i ngā pikitia ā ngā ākonga.
• Whakamahia rānei ngā mahinga toi ki te whakaputa kāri whakamihi i te whānau.

Arotahinga: Ngā Mahi a te Rehia

Waihanga Kanikani

Arā anō ētahi huarahi hai whakamāori, hai whakamārama i ngā wāhanga o te pūrākau nei.

• Me noho ā-rōpū kia tirohia, kia kōrerohia anō te pūrākau
• Matapakihia ngā tūāhuatanga o ngā taniwha e rua. Whakamahia he Mahere Kiripuaki hai taunaki i ēnei kōrero.
• Me whakaaro ake ngā ākonga ki ētahi nekehanga, ki ētahi mahi ā-tinana ka whakaatuhia te wairua o ngā kiripuaki.
• Hai tautoko pea i ēnei momo tūāhuatanga o te ‘whakaataata’ o te ‘whakaari’, tirohia ētahi kai kanikani me ā rātau mahi ā-tinana. Kōrerohia.
  • Atamira Dance Company
    - https://www.youtube.com/watch?v=SjF8MNQZL9Q
    - https://www.youtube.com/watch?v=VzzJ2FdApTw
  • Hip Hop Movement
  • Kapa Haka
• Me mahi ā-rōpū ngā ākonga
• Tukuna mā ngā ākonga tētahi kanikani/nekehanga e waihanga hai whakaatu i te paki/i tētahi wāhanga rānei o te paki [Whakamahia pea te rautaki ‘Freeze Frame’
  hai āwhina i ngā ākonga].
• Me auaha te whakaaro, me rongo hoki i te ihi, i te wehi, i te mana.

Hai whakaaro anō:

• Hopukina ngā kanikani ki te kāmera ka whakairi ai ki te paetukutuku o te kura, ki te whārangi pukamata rānei o te akomanga.
• Whakatūria he pō ki te hapori, ki reira whakaaturia ai ngā kanikani a ngā rōpū.

Arotahinga: Toi Puoro

He ngohe hai whakawhānui i ngā mahinga toi ataata, a te Rehia hoki

Hai whakaaro: tukuna mā ngā ākonga e …

• tito ruri, waiata rānei hai taunaki i te paki ka whakaahuatia, ka whakaarihia rānei
• kimi, e rangahau hoki i ētahi o ngā taonga puoro Māori ake nei hai oro, hai tangi ka tautokona te whakaari
• rangahau, e waihanga i t/ētahi taonga puoro ki ngā rawa tukurua, hai tautoko i te whakaaturanga, i te kanikani rānei
• whakarite haka mō ētahi wāhanga o te paki.