Whakatupuranga 1

Kei roto akomanga. Ko ngā tamariki hou me ngā Tau 1 ngā ākonga. He huinga iPapa hei whakamahi i tā rātou hōtaka ako. Kāore anō ētahi o ngā ākonga kia whakamahi i te iPapa, engari he matatau ētahi o rātou. Kua matapakihia ngā ture mō te tiaki me te whakamahi i te iPapa ki te akomanga.

Tā tēnei mahi e whakaatu ana

Kua wānangatia, kua matapakihia ngā ture ā-akomanga mō te tiaki me te whakamahi i te iPapa e ngā ākonga. Ko tētahi ture whānui tonu ko te tono whakaaetanga kia hopu whakaahua tētahi o tētahi tangata, mā te kāmera o te iPapa.

Hangarau Matihiko

Ko tā tēnei tauira he whakaatu mā te kaiako e ārahi te ākonga ki te waihanga, te raweke, te pupuri, te tiki me te tuari kōrero. 
Ka mōhio ngā ākonga:

• ko tā te pūrere/rorohiko he pupuri kōrero, e taea hoki taua kōrero te tiki ā tōna wā
• ki te tiaki pai i ngā pūrere/rorohiko me ngā ture ā-akomanga.

Ngā momo tikanga

Kua kōrerohia e ngā ākonga ngā ture ā-akomanga mō te whakamahi iPapa:

• te tono whakaaetanga i mua i te hopu whakaahua o te tāngata, o āna rawa rānei
• te tono whakaaetanga i mua i te hopu reo/āhua rānei o te tangata
• te pupuri tika i te iPapa, ahakoa tū mai, e hīkoi ana rānei
• te noho ki te tēpu, ki te papa rānei whakamahi ai i te iPapa
• te whakamahi anake i te iPapa i hoatu ki a koe, te tono whakaaetanga rānei ki te whakamahi i te iPapa o tētahi atu
• te whakahoki i te iPapa ki tōna wāhi
• te horoi ringaringa i mua i te whakamahi.

Ka mārama ko tā te rorohiko he pupuri kōrero, ā, mā te kaiako tētahi mahi whakahiato e ārahi: ki te waihanga, ki te raweke, ki te pupuri, ki te tiki, ki te tuari hoki.

Ka mārama ko tā te rorohiko he pupuri kōrero, ā, taihoa ake tiki atu ai.

Ka mārama ki te tiaki pūrere matihiko me te whai i ngā ture whakamahi ā-akomanga.

Whāinga

• Ohia manomanotia ētahi tikanga tiaki, whakamahi hoki i te iPapa.
• Whakarite rārangi ture whakamahi iPapa mā te akomanga

Putanga ako        

Ka taea e te ākonga

• te hoatu korero i roto i te mahi ohia manomano mō te kaupapa tiaki iPapa.

Paearu angitu

Ka angitu te ākonga mēnā ka taea e ia

• te whai wāhi ki te ohia manomano i te tiaki pai i te iPapa
• te hanga i ngā ture ā-akomanga mō te whakamahi iPapa

Hononga ki te Marautanga

• Wāhanga Ako: Hauora     Whenu: Tangata

Taumata: 1

Whāinga

Ka whakatinana i te aroha, i te manaaki me te awhi i te tangata, kia pūmau ai ngā taiao hei wāhi pārekareka mō te katoa.

He Tauira Ngohe

Kōrerotia, matapakihia ngā ture ā-akomanga kia noho haumaru, kia noho harikoa ngā tāngata katoa.

Te Ngohe

Kua whakamōhio atu te kaiako ki ngā ākonga ka whakamahi rātou i ngā iPapa i tēnei hōtaka ako. Ka kōrerohia ngā ara me ngā take mō te tiaki iPapa. Kua kōrero rātou mō ngā tikanga whakamahi iPapa ahakoa pēhea, ki hea rānei. Ka kōwhiria ētahi  ākonga hei kaitiaki iPapa, hei kohi me te hono atu ki te pūhiko. Ka whakaritea ngā ture, kia auau hoki te kōrero ā-waha a te ākonga.

Rerenga kōrero

Pai anō taku hopu i tō whakaahua? 
Am I allowed to take your photo?

Pai ki a koe taku hopu i tō reo? 
Am I allowed to record your voice?

Māku tō whakaahua e hopu.
I will take a photo of you.

Māku tō reo e hopu.
I will record your voice.

Me pēhea tā tātou tiaki pai i te iPapa? 
How do we look after the iPad?

Me pēhea tā tātou whakamahi tika i te iPapa? 
How do we use the iPad appropriately?

Kupu hou

hopu reo – record voice

iPapa – iPad

kāmera – camera

mata – screen

hopu whakaahua – take a photo

tono whakaaetanga – seek permission

Rauemi

• Papamahi – tablet
• Papamā (he pepa nui rānei)
• Pene, pine

Aromatawai

Ka mōhio ngā ākonga ki:

• ngā ture mō te tiaki me te whakamahi pai i te iPapa
• te whakamahi i ngā ture mō te whakamahi i ngā iPapa.

Raupapa mahi

Ngā whakaritenga

I mua i te tīmatanga. Tuhia ngā whāinga me ngā paearu angitu ki te papa. Whakamahia he iPapa. Me whakamahi pepa hei tuhituhi i ngā ture kua whakaritea mō te akomanga.

Tīmatanga

Kōrerotia ngā whāinga, ā, ka matapaki ai i te tūmahi. Pānuihia ngā paearu angitu.

Waenganui

E noho ki te taha o te papamā. Kōrerotia te kaupapa o te whakamahi tika i te iPapa i roto i te akomanga, te tiaki pai hoki. (Whakaatuhia te iPapa me ōna wāhanga). Pātaihia ngā ākonga ki te tuari whakaaro, ka tuhi ai ki te papamā.

Matapakihia ngā whakaaro kātahi ka whakarōpū haere, kia tau ki tētahi rārangi e māmā ai te maumahara a ngā ākonga. Kia oti te whakarite mai i ngā ture, tuhia ki tētahi pepa nui ka tāpiri ai ki te pakitara. Tāia hoki he pikitia hei whai i ngā kōrero.

Ētahi atu whakaaro

Whakahaungia ō ākonga ki te whakatinana i ngā ture nei, hei tauira, te kohi i te iPapa mai i tōna wāhi me ō ringa e rua, te pupuri tika i te iPapa.