Ngārarahuarau

I nehe rā, e ora ana tētahi iwi ira atua, whakahara hoki e kīia ana ko Te Kāhui Tipua. I noho rātou ki te moutere o Te Patunui-o-Āio. I tētahi rā, ka hīkoi mai Te Kāhui Tipua mā Te Moananui-a-Kiwa ki Aotearoa nei.

I te taenga mai ki Te Ika-a-Māui, i tata mate katoa rātou nā te kino o te whawhai ki waenganui i a rātou anō. Nā reira, i panaia te tokotoru kino rawa atu e tō rātou rangatira, a Kōmakahua, ki Te Waipounamu.

Ko Kōpūwai te tuatahi. He tipua-kurī a Kōpūwai. I panaia ia ki Ōtākou, i Te Taurapa-o-Te-Waka-a-Māui. Ka noho ia me āna mōkai kurī upokorua ki te taha o te awa o Mataau. Ki a ia, kāore i kō atu, i kō mai i te hopu me te kai i te tangata!

Ko Pouākai, he tipua-manu ko ōna matikuku he rite ki te māripi koi! I panaia ia ki te tihi o Tāwera, i Ngā Pākihi Whakatekateka o Waitaha. Ka hopu tangata a Pouākai, ka kawe ki runga rawa me te whakataka atu i te rangi kia mate rā anō.

Me Ngārarahuarau? He tipua kikino ia me ōna unahi nunui. He upoko tangata, he tinana ngārara. I panaia ia e Kōmakahua ki Te Tauihu-o-Te Waka-a-Māui.

I noho a Ngārarahuarau ki roto i tōna ana ki Wainui, i Mohua. Ia te rā, ia te rā, ka tatari a Ngārarahuarau ki te hopu i ngā tāngata e hipa ana. Te reka hoki o te kiko tangata!

I tētahi rā, kāore a Ngārarahuarau i kai i āna patunga katoa. I pupuri ia i tētahi wahine a Rūru hei mōkai māna. I tono a Ngārarahuarau i a Rūru kia tunu i āna patunga.

Haere tonu ēnei mahi tae noa ki te wā i kite ai a Rūru ko wai kē tētahi o ngā tāngata i patua.

“Auē! Ko wai kē tēnei?” tana karanga. “Āiii! Ko taku tungāne purotu!”

Ka pukuriri a Rūru! “Me utu a Ngārarahuarau mō te mahi nei!” tana whakaaro. “Engari me pēhea?”

Nāwai ā, ka tau mai te whakaaro ki a Rūru ... me mahi māminga kia aroha a Ngārarahuarau ki a ia!

I tunu a Rūru i āna kai, i whakarongo a Rūru ki āna kōrero, i atawhai hoki a Rūru i te tipua rā.

Pō mai, ao mai, ka piritahi a Ngārarahuarau rāua ko Rūru.

Ka haere te wā, ka tipu te aroha nui o Ngārarahuarau ki a Rūru.

“Me moe tāua, e Rūru,” tana īnoi. Ā, ka whakaae tere atu a Rūru!

Kātahi ka mea a Rūru ki a ia, “E te tau, me tūtaki taku whānau ki a koe. Ko au ki mua, nē? Me whakarite mātou i te marae mō tō taenga atu.

I whakaae a Ngārarahuarau kia hoki atu a Rūru ki tōna kāinga i Whakatū.

Hīkaka ana a Ngārarahuarau ki te tūtaki i te whānau o Rūru!

I te taenga atu o Ngārarahuarau ki Whakatū, he hākari nui, he wharenui whakahira hoki kua whakaritea mō rāua. Ka mutu te kai, ka hari a Rūru i a ia ki roto i te wharenui.

I takoto a Ngārarahuarau, ā, ka tīmata a Rūru ki te waiata. Nā te kī o te puku me te wera o te ahi, kāore i roa ... ka warea a Ngārarahuarau e te moe ātahu. I a Ngārarahuarau e ngongoro ana, ka puta huna atu a Rūru ki tōna iwi e tatari ana ki te pō.

He tere tā rātou aukati i ngā kūaha me ngā matapihi o te whare, kātahi ka tahuna te whare. Ka ngiha te ahi, ka mura te ahi, ka wera te ahi! Mitimiti ana ngā muramura i te rangi pō!

I oho ake a Ngārarahuarau. E mura ana tōna tinana katoa! Ka auē! Ka auē! Kua mōhio ia ka mate ia. Huri ki hea i te whare, kua aukatia ngā putanga katoa. Kātahi ia ka puta atu i te tuanui o te whare ki te pōuriuri!

Auē te mamae e ngau kino nei! I rapu ngā karu o Ngārarahuarau i a Rūru. Ka kite i a ia e whāngai ana i te ahi. I te hiahia hoki a Rūru kia mate ia?

Pākarukaru ana te ngākau o te ngārara nei!

Kua mōhio ia ko te wāhi haumaru anake, ko tōna ana ki Wainui! Ahakoa e wera tonu ana, ahakoa e tata mate ana, i parahutihuti tana haere. Ka ora ia, kāore rānei?

Kotahi atu te oma a Ngārarahuarau ki te tihi o Pikikirunga. I reira ka taka ōna unahi wera me te huri hei toka. Kātahi ia ka keri ki roto i te maunga, oti mai ana he rua nui ki te tihi o Pikikirunga. I keria ngā ana i tana omaoma ki te takutai. Ka tipu ngā kōeko iri me ngā kōeke tū i muri i a ia.

Kua pakaru te tero o Ngārarahuarau, te tipua o Wainui, nāna te tini o te tangata i patu, i kai. Koia anō tērā i mate i roto anō i te kōpū o Pikikirunga.

I heke iho ngā toto i tōna tinana. Mai i roto o Pikikirunga ka rere kia puta i ngā horowai o Wainui ki tōna ana i takutai. Ka kōmitimiti ki ngā tai o Wainui.

Ki te haere koe ki Wainui, ka waimarie pea koe, ka kite i ētahi whatu whero iti i waenganui i ngā pata onepū koura manomano. Koia nei ngā kōpata toto o Ngārarahuarau kua huri hei kōwhatu.

Ā, kia tae atu koe ki te tihi o Pikikirunga, ko ngā toka rerekē e ārahi ana i a koe ki te rua whakahara – he unahi wera i taka i te tinana o Ngārarahuarau.

Koinei ngā mea e tohu ana ki a tatou ... i nehe rā, i hīkoi mai Te Kāhua Tipua mā Te Moananui-a-Kiwa ki Aotearoa nei.