Kati
thumb te whakarere i wharekauri
Te Whakarere i Wharekauri – mā te pouako

Te Whakarere i Wharekauri – mā te pouako

He Whakamārama Whānui

He kōrero ēnei mō te awe o Te Kooti Rikirangi me ana taonga tuku iho ki ōna iwi, otirā ki te iwi Māori whānui. Ko te takiwā e arotahia ana, ko ngā tau mai i te 1865 ki te 1868. Ko ngā āhuatanga e whakaahuatia ana, ka tū ki Te Tai Rāwhiti me Wharekauri. Ka kōrerotia te mauhere hē i a ia, tana noho herehere ki Wharekauri, me te murunga o ngā whenua, ngā rawa me nga pānga pakihi i muri mai. Ka whakaahuatia hoki tētahi raru i pā i tata hemo ai a Te Kooti i a ia e mauheretia ana ki Wharekauri, ngā kupu whakaari a Te Kooti, me te orokohanga ake o te Hāhi Ringatū.

Te Pukapuka

He mea tuhi te pukapuka nei e tētahi uri o Te Kooti, e Peter Moeau, ā, kua tautokona e Te Tira Whakaari Trust me te whānau whānui o Peter.

Ko ngā whakaahua o Te Kooti i te pukapuka nei, he whakaahua auaha, kāore e whai ana kia whakaata pū i tōna āhua tūturu. Ahakoa arā ētahi whakaahua ōna, he mea kapo ki te kāmera, ki te ringa tā whakaahua hoki, e ai ki ana uri, kāore ērā i rite pū ki tōna āhua tūturu.

Ētahi Horopaki Ako e Hāngai ana

Tekau mā rua ngā upoko o te takinga hītōria nei. Kua mātua tuhia mā ngā kaiako me ngā ākonga kei te taumata 3–4 o Te Marautanga o Aotearoa. Ko te tikanga, ka whaihua i roto i te whakaakoranga o ngā Hītori Māori me ngā Tikanga ā-Iwi.

He kōrero atu anō mō Te Kooti Rikirangi me ngā mahi e mahi nei ōna uri hei hāpai i tōna mana, kei te pae tukutuku a Te Tira Whakaari Trust.

Ngā hononga ki Te Marautanga o Aotearoa

Hītori Māori

Mā roto i ēnei kōrero, ka āhei ngā ākonga me ngā kaiako ki te wherawhera i ngā kaupapa whānui e tautohua ana i Te Takanga o te Wā.

  • Whakapapa
  • Tūrangawaewae
  • Mana Motuhake
  • Kaitiakitanga
  • Whanaungatanga

Tikanga ā-Iwi

Te Ao Hurihuri

Ka whakawhanake mōhiotanga te ākonga ki:

  • ngā pānga i waenga i te tangata me ngā tūāhua o mua, ngā whakapono me
  • ngā whakaawenga i waihangatia ai te porihanga;
  • ngā whakamāoritanga o aua pānga i te huringa o te wā.

Taumata 3

3.1 Ka whakamārama i te whakaawenga o ngā whakaaro me ngā mahi a te tangata i te oranga o ētahi atu i ngā wā o mua. Ka whakamārama i ngā huarahi e taea e te takitahi me te rōpū te urupare ki te panoni.

Taumata 4

4.1 Ka tautohu i ngā pūtake me ngā otinga o ngā tūāhua kua waihanga i te oranga o te tangata. 


4.2 Ka whakaahua i ngā huarahi e tuhia ai, e maumaharatia ai ngā mahi o mua.

Ētahi Mahi e Hāngai Ana

  • Te tūhura i ngā hono whakapapa i waenga i ngā tāngata me ngā iwi i roto i tēnei kōrero. Te waihanga i ētahi tūtohi whakapapa me te whakaemi hei mauhanga mā te akomanga.
  • Ka mahi ā-rōpū ngā ākonga ki te tuhi rārangi wā, mahere whenua hoki hei whakaatu i te raupapa o ngā āhuatanga nui i pā me ngā wāhi i tū ai.
  • Te rangahau i tētahi o ngā tāngata nui i ara ake i roto i ngā kōrero. Te whakapuaki i ngā kitenga ki te whakaaturanga PanaHiko.
  • Te rangahau i ngā waiata i titoa e Te Kooti.
  • Te tūhura i Te Hāhi Ringatū, ōna takenga mai, tae atu ki tōna awe, ki tōna mana i te ao Māori i ēnei rā.
  • Te rangahau i ētahi atu hāhi, whakapono Māori me ngā takenga mai, hei tauira, ko te Paimārire.
  • Te waihanga mahi toi ko ngā whenua me ngā tohu whenua kei ēnei kōrero te kaupapa – a Tūranganui a Kiwa, a Wharekauri, a Waiapu, me Whareongaonga.
  • Ka mahi ā-rōpū ngā ākonga ki te tuhi whakaari mō tētahi upoko o te pukapuka. Ka whakaaritia ki te akomanga, ka mahia rānei hei ataata poto.

Down the Back of the Chair

Ka wātea he tāruatanga anō o tēnei pukapuka i Down the Back of the Chair, mā te hoatu i te nama take 712045.

Waea koreutu: 0800 660 662

Waeatuhi koreutu: 0800 660 663

Īmēra: orders@thechair.minedu.govt.nz

hills
Rauemi tūhono