Kati

Wāhanga 1 - Ōrangituapeka

Ko te pakanga o Ōrangituapeka te hua o te pakanga i tū ki Te Namu ki waenganui i a Taranaki me Waikato, he pakanga Māori ki te Māori. Ahakoa ngā riri me ngā mate i pā mai ki ngā iwi e rua, i te mutunga iho ko te maungārongo. Ko tēnei wāhanga e aro ana ki tēnei pakanga i tū ki waenganui i a Waikato me Taranaki ki Ōrangituapeka.

Kotahi te kaupapa matua, e toru ngā ngohe.

Te wāhanga o TMoA

Te Whenu

Te Whainga Paetae

Ngā kaupapa matua  

Ngā kawenga mā te kaiako

Ngā mahi a te ākonga

Tikanga ā-Iwi

Te Wāhi me te Taiao

5.1

Ka whakamārama i ngā take e neke haere ai te tangata ki wāhi kē, me ngā putanga iho o ēnei nekehanga ki te tangata me te wāhi.

Te Pakanga o Ngā Ngutu Maioro

Kei te waha pū o te awa o Kāpuni ngā pā e rua nei, ko Waimate ki tētehi taha ko Ōrangituapeka ki tētehi, he pā tūwata tawhito ēnei nō Ngāruahinerangi. I ngā rā o  mua i tū te pakanga whakamutunga a Kīngi Pōtatau ki ngā iwi o Taranaki i konei i Waimate/Ōrangituapeka. Te nuinga o taua ope rā i pakanga ki a Waikato he Ngāruahinerangi he Taranaki Tūturu. Ko ngā rangatira ārahi tauā o Taranaki ko Te Matakātea, ko Ngātai, ko Manaia, ko Ariki Tītokowaru, ko Te Pakeke, ko Tihe, ko Tiako, ko Mouriōrangi, ko Te Awaroa rātou ko Tūirikawa. Ko ngā matarau whero o Waikato ko Kīngi Pōtatau Te Wherowhero, ko Te Kanawa rātou ko Te Waharoa. E iwa rā te pakanga nei katahi ka tū te riri ka rere ko moungārongo ka tatau pounamu ki waenganui i ngā iwi nei, a Waikato, a Taranaki. Ka mutu i konei te pakanga a Waikato ki a Taranaki.

Ko tā te kaiako mahi he whakamārama i ngā āhuatanga katoa o tēnei pakanga ki ngā ākonga, mā te kaiako e āta whakamārama i ēnei kaupapa kei raro iho nei hei ārahi i ā ia:

·         Ko wai a Matakātea?

·         I ahatia a Waikato i te pakanga o Te Namu?

·         Kei whea ā Ōrangituapeka?

·         Ko wai ngā rangatira nō Taranaki i Ōrangituapeka?

·         Ko wai ngā rangatira o Waikato i tae atu ki te pakanga i Ōrangituapeka?

·         He aha te nui o te tauā o Taranaki?

·         He aha te nui o te tauā o Waikato?

·         Tokowhia ngā tāngata nō Waikato i mate?

·         I aha a Taranaki ki te tiaki i tō rātou pā?

·         He aha te hua o tēnei pakanga?

 

Matakātea (whakaaturanga)

He mahi takirua

Mai i ngā kōrero kua whāngaihia ki ngā ākonga mō te pakanga o Ōrangituapeka, ko tā te ākonga mahi he rangahau i te rangatira nei a Matakātea, ka whakarite i tētehi whakaaturanga rorohiko e whakautu ana i ēnei pātai.

 

Ko wai ā Matākatea?

I whānau mai ia i whea?

He aha tōna whakapapa?

He aha tōna pepeha?

He aha āna mahi i Te Namu me Ōrangituapeka?

He aha ētehi atu mahi ā Matakātea?

I mate a Matakātea i tēwhea tau?

 

Ngā Toi

Toi Ataata

4.

Ka whakawhanake ariā, ka whakapakari pūkenga, ka whakamārama, ka whai māramatanga te ākonga: mā te tūhura me te whakamahi i ngā hua o ngā rawa, rawa tā, me ngā taputapu.

Ōrangituapeka (whakaahua taiao)

Mahi takitahi

 

Mai i ngā kōrero kua whāngaihia ki ngā ākonga mō te pakanga o Ōrangituapeka, ko tā te ākonga mahi he tā i tētehi whakaahua taiao o te pā o Ōrangituapeka.

Kia A3 te rahi o te whakaahua, mā te ākonga e whakatau i te koki e tāngia ai te pikitia.

Hangarau

 

 

 

Ngā Āhuatanga o te Hangarau

6.2

Ka tūhura i ngā āhuatanga matua o te tangata e pā ana ki:

• ngā pūnaha, ngā tukanga rānei;

• te hiahia o ngā kiritaki;

• ngā rautaki whakatairanga ki te kiritaki

 

Ngā rā e iwa o te pakanga (Diary writing)

He mahi takitahi

Mai i ngā kōrero kua whāngaihia ki ngā ākonga mō te pakanga o Ōrangituapeka, ko tā te ākonga mahi he tuhi kōrero mō ia rā   o tēnei pakanga e whakamārama ana i ngā āhuatanga o ia rā.

 

Ko tā te ākonga mahi he tuhi ānō nei ko Matakātea ia. Ia rā ka hoki a Matakātea ki tōna whare ka tuhi i ngā āhuatanga me ngā pānga o taua rā.

 

Mai i ngā kōrero kua whāngaihia ki te ākonga me ngā kōrero kua rangahaua e ia mō Matakātea, māna ēnei tuhinga rātaka e tuhi o ngā rā e iwa o tēnei pakanga.

Te Reo

Ā-Tā

Puna Reo

6.2

Ka whānui te puna kupu e taea ai te tautoko, te whakawhitiwhiti māramatanga, te whakakotahi hei whakatau, hei whakaiti rānei.

 

Maungārongo

Mahi takitahi

 

Mai i ngā kōrero kua whāngaihia ki ngā ākonga mō te pakanga o Ōrangituapeka, ko tā te ākonga mahi he tuhi i ōna whakaaro mō te maungārongo, ka whakautuhia tēnei pātai:

 

He aha te maungārongo ki a koe?

 

Mutu ana tāna tuhi i ōna whakaaro ka whakapuakihia ki te akomanga.