Ngake me Whātaitai – Hakoritanga

Ka hoki ki ngā rā ōnamata, ki te ao atua, ki te ao tupua
Tērā ko ia a Māui pōtiki, ka mānū, ka rewa, ka ea ki runga
Ko te Ika nui e, Ko te Ika a Māui tikitiki ho!

Ka puta mai rā ko Te Kāhui Mounga, he hurunga tupuna, he hurunga tangata
Ka takina mai rā ko Te Hau tupua
Ka rū, ka rā, ka hū, ka hī, ka puea ake he taniwha e

Ka papaki mai rā ko te hikuroa a Ngake
Wāhia te kauwae ki Te Remutaka, ko Te Awakairangi
Tika tonu rā ki ngā niho
Ka tukitukihia, ka panapanahia
Ka hāmama ko te waha o te ika e

Ko Whātaitai tērā, ka totohu, takahuri,
ka koemi, takawiri
Horo atu ki te rua korokoro e
Ka haoa mai a Ngake ki ngā wai pāpaku
Whitiria e te rā, ka mimiti, ka memenge, mate atu e

Ko tōna wairua he manu te āhua
Keo, Keo! Te tangi ki ngā taniwha
Keo, Keo! Te tangi ki te tangata
Ka marewa ki te rangi, ka pā ngā hihi
Kānapanapa ana, kārohirohi rā
Topaki atu rā, whakangaro atu ana, Hei!