Kā tapuwae o Māui

Ka mea ā, ka tae a Māui ki Kā Umu o Hapopo.

He kekeno e pāinaina ana i kā toka pounamu rahi. Ka piki a Māui ki ruka ake o te whaka, ka tokia atu te whenua ki tana toki, a Tiheimauriora.

Ka rere tonu a Māui, me tana whakamīharo ki kā mauka e matika mai ana i te moana.

Ka whakaaro tana manu mōkai, a Piopio, kia mau tonu ia ki tēnei wāhi. Nō reira ka whakamanu a Māui i a ia, kia kotahi atu anō ai tā rāua rereka tahi ko tana hoa. Tapaina ana te wāhi nei e Māui ko Piopiota

Ka rere anō a Māui. Ka tae ki tētahi wāhi, ka tukuna te puka o Mahunui, ka mōhiotia tēnei wāhi i muri ko Te Puka o te Waka o Māui. Ka tae rātou ki kā oneroa, ka whakatā, ka kohi kai mō te rereka kai mua tonu i te aroaro. Ko te ikoa o tēnei wāhi, ko Ōmāui.

Ka tere anō a Mahunui. Heoi anō, ka karawhiu te āwhā, hūkerikeri ana te hau, hūkerikeri ana te wai, ka tīhaea i konā te rā o tō rātou waka. Nō reira, ka kimi wāhi haumaru rātou e ū ai rātou ki uta.

Ka kitea he whaka whakaruru, ka noho ki reira mō tētahi wā ki te raupine i tō rātou waka.

Ka rewa anō a Mahunui. Nāwai ā, ka tae ki Te Tai o Marokura. I reira ka pania e Māui tana matau hī ika ki kā toto o tōhona ihu, ka makaia ki te wai.

Ka roa a Māui, e kukume ana, e huhuti ana, e hī ana. Nāwai ā, ka hīia ake tētahi ika nui whakaharahara. Ko ia tēnā, ko Te Ika a Māui e mōhio nei tātou i ēnei rā.