E whakawhiti ana ki Tāhūrangi – te tauranga matihiko hou mō ngā rauemi whakaako ki runga ipurangi

Kua whakarewahia ana e mātou a Tāhūrangi: te tauranga matihiko hou mō ngā rauemi marautanga, ngā rawa whakaako me ngā pūrongo mōhiohio.

Mō Tāhūrangi

Kei Tāhūrangi ngā kōrero hei tautoko i ngā mahi whakaako, akoako hoki mō Te Whāriki: He Whāriki mātauranga mō ngā mokopuna o Aotearoa Early Childhood Curriculum, mō Te Marautanga o Aotearoa me The New Zealand Curriculum. Ā, i ēnei rangi e heke mai nei, ko Te Whāriki a Te Kōhanga Reo hoki tērā. Ka taea e ngā whānau, ngā mātua me ngā kaitiaki te toro atu ki ēnei rauemi, pārongo hoki hei āwhina i ā rātou tamariki me ā rātou mahi akoako.

• He maha ngā hua matua o Tāhūrangi hei whakamāmā ake te rapu, te whakarite, te tikiake me te tuari i ngā rauemi me ngā rawa whakaako hoki.
• Ko ngā whāinga rapunga kei ngā reo e rua, te reo Māori, me te reo Pākehā, kia taea te rapu ki te reo kotahi, engari ka puta ake ngā otinga ki ngā reo e rua.
• Ko ngā momo tātaritanga rapu kia tere kitea ai e te kaiwhakamahi te rauemi e hiahiatia ana.
• Te āhua o te tere tikiake i ngā rauemi.

Tāpiri atu ki tērā, ka taea e ngā kaiako te waitohu atu ki Tāhūrangi mā te whakamahi i te Whakauru Rāngai Mātauranga (Education Sector Logon), e uru ai rātou ki tō rātou ake pūkete me ētahi āhuatanga tāpiringa. Ka taea e rātou te:

• whakarite me te puri rauemi hei waihanga i ā rātou kohinga, hei tiro mā rātou
• tuari i aua kohinga me ētahi atu kaiwhakamahi o Tāhūrangi
• puri i ngā mariu reo.

Mēnā kāore anō koe kia whai wāhi ki te ESL engari e hiahia ana koe ki te uru atu i ngā āhuatanga i runga o Tāhūrangi, pāwhiria tēnei hononga ki te tono whakaurutanga: How to get an Education Sector Logon | Applications & Online Systems 

Ko ngā kōrero kei runga o Tāhūrangi i tēnei wā, he tīmatanga noa iho. Ka ngana tonu mātou ki te neke i ngā kōrero mai i ngā pae tawhito ki te pūhara hou, ā, arotakehia ana aua kōrero rā ki te tiro mēnā e whai hua ana, e tika tonu ana rānei ngā kōrero. E ngana ana mātou ki te whakatika i ētahi hapa hangarau nei kua kitea e mātou, ā, e whakamāramahia ana ki runga o Tāhūrangi. Hei kōkiri whakamua, kua rewa katoa ā mātou kōrero marau hou, ngā rauemi me ngā rawa whakaako ki runga o Tāhūrangi.  

Tirohia te pae hou ki konei:

https://tahurangi.education.govt.nz   

Te pānga ki ō mātou pae o waho, mō Kauwhata Reo hoki

I te otinga, ka noho ko Tāhūrangi anake, ka whakawāteahia a Kauwhata Reo, a TKI me Te Whāriki Online, kia hāngai ai te rapu o te hunga kaiako i ngā rauemi e hiahiatia ana ki te tautoko i ngā mahi whakaako, akoako hoki. Tōnā tikanga nā te mea he pūhara hou, ka noho hei papakāinga mō ngā kōrero marau katoa, ka panonitia ngā paetukutuku e whai ake nei:

• Kauwhata Reo: Ko ngā kōrero mai i Kauwhata Reo ka utaina ki runga o Tāhūrangi, he iti noa ngā rauemi kei reira i tēnei wā, heoi, he tīmatanga noa. I tua atu i tērā, ka taea e ngā kaiwhakamahi te uru atu ki ngā rauemi, mā mātou hoki rātou e whakamōhio mēnā ka utaina anō he rauemi kē ki runga o Tāhūrangi. I muri i ngā arotakenga, ka nekehia ngā kōrero mai i ngā pae o Kauwhata Reo, kātahi ka ritāiahia, kāore e taea te whakamahi
• TKI: I muri i ngā arotakenga ka nekehia ngā kōrero mai i ngā pae o TKI, kātahi ka ritāiahia, kāore e taea te whakamahi. 
• Te Whāriki Online: Kua wātea mai ngā kōrero katoa e pā ana ki Te Whāriki: He whāriki mātauranga mō nga mokopuna o Aotearoa Early Childhood Curriculum ki runga o Tāhūrangi ināianei. Ka ritāiahia tēnei wāhanga, kāore e taea te whakamahi. 

Kua wātea mai ngā kōrero o Te Whāriki a Te Kōhanga Reo mā te hunga kaiwhakamahi mā te hononga kei te whārangi papakāinga o Tāhūrangi, torotika atu ki Te Whāriki Online. Hei ēnei rā e heke mai ana, ka utaina ngā kōrero ki runga o Tāhūrangi – mā mātou koutou e whakamōhio ina oti ana tēnei mahi.